روايات ليبية – موقع إقرأ يقدم لكم مجموعة من افضل روايات ليبية خيالية، وروايات ليبية رومانسية جريئة، وروايات ليبية جميلة، لكل محبي القراءة والروايات الرومانسية الجميلة والشبابية إخترنا لكم رواية ليبية تجمع بين القلوب…نرجوا ان تنال إعجابكم للمزيد تابعوا معنا.
روايات ليبية
طلعت من الحوش وشبحت البنات في الجانب الثاني من الطريق شيرتلهم بيدي و جريت بنقص الطريق وفجأة سمعت صوت اعياط البنات وسياره تجري كانت مقابلتني غمضت عيوني
وفي لحظه معاش حسيت باي شي بحداي……
التموا عليا الناس وجو صحباتي كانو يعيطو من المنظر انا كنت مش حاسه بشي بكل ضربتني السياره وكنت قاعده ساخنه من الضربت شبحت لقيت روحي دم في كل مكان كان المنظر مرعب وصدمة كبيرة
جيت بنصبي علي رجلي حسيت روحي فاشله ومش قادره كل وفي لحظه اغمي عليااا فقدت الوعي
ولد جيران كان ديما لما نطلع يقعمز قدام الحوش ويشوف فيااا لما نمشي للمدرسة
شافني لما ضربتني السياره مشي يجري لحوشنا ويدق علي امي جت تجري امي
وليد : ايدق بالقوة…يااا عمممتي ياااعمتي
امي تسمع في حد ينادي بصوت عالي جت تجري فتحت .. خيرررك ياااوليد شن فيه
وليد/.. …مووودة ضررربتها السيارة
امي.. قعدت تعيط بصوت عالي وين ضربتها وتضرب ع وجها وتعيط… حي عليااا بنتي واااك عليااااا…،
وليد : اهني في بدايه الشارع
امي طلعت تجري لمكان الحادث وليد بجري معها ماوصلو للمكان وكانت الاسعاف رفعتني
طلعو الجيران وحاولو يهدوو امي ورجعوها للحوش
كانت حاله امي بكلل تبكي وعلي طول تلفونها واتصلت بخوتها اتصلت بي جابر
جابر : الووو خير
امي :تبكي وتشهق… تعاااال باااجابر يااخوي مووودة ضربتها سيارة ورفعوها للمستشفى
جابر/ لا حول ولاقوة الابالله امتى صار
امي : توا طلعت مني تررربح بسرعة تعال ارفعني ليهاااا ياااخوي قلبي نااار عليهااا ووواك يابنتي
جابر : خلاص اسكتي جايك… وصكر منها وصكر المحل متاعه واتصل بخوته خبرهم يمشوا للمستشفى قدامهم
وهو مشى لأمي رفعها للمستشفى
وصلت للمستشفي وعلي طول كانت حالته تعبانه دخلوني لغرفة العمليات ودارو عمليه علي خاطر يوقفو النزيف ووقفو النزيف بس صارتلي حاجه ماكنتش متوقعه اني تصيرلي بكل
الدكتور كان يبي تاكد من الشك متاعه قاللهم ديرولها تصوير بالرنين المغناطيسي طلع الدكتور برا ودخلوني للتصوير
كان الكل يستنى فيااا ع نار براا امي وخوالي وناس هلبااا اغلبهم نعرفهمش بس يعرفو امي وخوالي
ماكنتش متوقعه انا رح يجي يوم ويصيرلي زي توا ممكن ربي يعاقبني علي انك كنت متكبره وهكي كانت صدمه كبيره
خالي : خير يا دكتور طمننا شن حال البنيه توا
الدكتور : للاسف… مانكذبش عليكم وضعها سي جدا احني وقفنا النزيف بس حاليا بنديرو تصوير علي الجسم بالكامل وانشاء الله خير
امي : تندب وتعيط… ووواك بنتي ياااربي بنتي اااه يااامودة ياقهرتي عليك…
جي خالي محمد الكبير وحاول يهدي امي وقاللها انشاء الله حالتها كويس
امي : حالتها حالة… ياااربي ياااربي نجيلي بنتي ياااربي خوذ عمرررري وعطيهالهااا
خالي محمد شبح لخوه جابر…قاللهم روحو بيها للحوش عشان كانت حالته بكل وفي هلبا ناااس
امي تبكي… لااا وين نمشي ونسيبها والله ماني متحركه من ااهني
خالي محمد قرن حواجبه… وشد امي علي جنب قاللها روحي لحوشك وصغارك اكيد ياما صاير فيهم مرعوشين شن عندك ماديري هنا انا قاعد هنا ولو في رح نخبرك
امي ناررر في قلبي ياخويااا كيف انروح وبنتي مانعلم بحالهاا بالله عليك خليني نقعد حتي شوي
خالي محمد تعال ياجابر…رح باختك واقعد غادي معاهم لو في حد يجي استقبله
ركبت امي في السياره وهيا تبكي وقلبها محروق عليااا ونا ف الوقت هدا كنت في غيبوبه مانعلم بشيء بكللل
وصلت امي للحوش وخشت وجو خوتي الصغار
منال: تبكي… وووين موودة ياماما…
امي حضنتهم وقعدت تبكي بصوت وتقول في كلام ماخلت عزم للموجدين
مرت خالي محمد قعدت تسكت ف امي وخوتي خلاص يا امنه حرام عليك رعشتيهم
وسالت امي قاتلها شن صار في موده انشاء الله حالتها كويسه
امي : مقعمزة ع الارض وتهز… ادعولها موودة حالتها ميؤس منها
خلااص بنتي قاعدة اااتموووت وووواك علياااا وووااااك
…وياحرام فات هذاك الصبح اعياط وبكاء ولين العصر كل شوية تتصل بخوتها وتقولهم شن صار في موده بس خوتها قالولها مافي شي لعند تواا
دارو الصور متاع الرنين لياا وطلعو وجابولهم للدكتور شافتهم وقال لاحول ولا قوة الا بالله هدا يلي كنت متاكد منه بنت صغيره حرام يصير فيها هكي…..
في اميركا
في حوش عمي سالم كان حفل تخرج ايمن من المجاستير وكان داير حفل كبير لااصحابه
في حوشهم وطبعا الناس مختلطة اجانب وفي شويه ليبين
طبعا بما انا ايمن ولد في أميركا فحياتهم كانت كيف الاجانب بناتهم مش متححبات وايمن عايش مستقل بروحه سيب حوش اهله وخدي شقه بروحه وطبعا يمشي كل فتره وفتره لاهله بس اغلب الوقت كان في شقته لانا كانت الجامعه يلي يقرا فيها في ولايه تانيه
عنده شقة عايش فيها مع صديقته الامريكية اسمها كارمن و عايش حياته بطول والعرض
نتعرفوا عليهم
امه تكون نادية عندها مركز تجميل وشخصية شيك واهتمام بشكلها ولبسها وكل حياتها شغل وموضة ومخليتهم ع حريتهم البنات والاولاد عنها
ايمن الكبير م 88متخرج مجاستير من الهندسة معمارية شخصيته هادي وشاري مزاجه انسان واخذه تيار حياة الاجانب لا يحرم ولا ايحلل غير الصيام مايعرفش في دين حاجة
بس داخله انسان طيب وحنون وعنده انسانية الاجانب اللي حتى ع الحيوانات
صاحبته اسمها كارمن بنت من اب امريكي وام ارمنيا
وعايشين مع بعض ك زوجين و بس مافيش ارتباط شرعي ولا قانوني بس حبها وفكر انه يتزوج منها
خوه اسمه يمن مواليد 93 وعنده زوز خوات دانيا 96
وروان 2000 هادم عيلته عمي
في الحوش عند أيمن كارمن لافة ايديها حولين رقبت ايمن وتبوس فيه لا حشم ولا عيب عاد امر عادي عندهم و جو موسيقى و بوفيه مفتوح وجو اصحابه ودارو حفل كبير ودارو تورته وجو كاين خيال عندهم بكل
كمل الحفل وروحو كلهم وقعدو العيله
نادية تشبح لايمن… مش قلت بتقطع علاقتك بيها شن قاعدة ادير معك هنا
ايمن :ليش بس تكرهيها شن دارت هيا
نادية : مش ح نستناها لين ادير حاجة ساد هي واخذتك ومانعاتك تتزوج ودير عيلة
ايمن: اوووف علينا مش قوتلك مش ح نتزوج اني عجبتني حياتي مش ناقصني شي
نادية: هااا ولامتى ان شاءالله ولا ماتبيش ايكون عندك اصغار
ايمن :هععع تافه… اللي في راسك طلعيني منه بالله عليك
نادية : لاااا مش ح نوقف وح نقعد وراك لين تتزوج من سالي
ايمن : صبى… سالي مش ح نتزوجها يام ومعش تربطيها معاي خلي البنت اتشوف حياتها وانتي فوتيني زواج لا لا… وطلع سيبها ومشى لكارمن
ايمن: هيا خلينا نمشوا
كارمن : اوكي… وشبحت في اخته دانيا ..الي اللقاء
دانيا : باي … وتلعب بالتلفون وحاطة رجل ع رجل
نادية تكون ام ايمن : كانت تغلي … شوفتي خوك كيف شاد فيها اخ يا مراري توا شن فيها من سماحة ولا شكل ماتقارنش باسالي حتى شوي
دانيا : عيونها ع تلفون… خلاص خليهم في حالهم ايمن عاجبته وراضي بحياته علاش تحرقي في روحك ياامي
نادية : شبحتله بطرف عينها… واني لمن جاية نشكي اخ بس… ومشت رقيتلها لان من سنة وهي تبي اتزوج ايمن من بنت صاحبتها بنت ليبية من عيلة معروفة ودارت كل المحاولات بيش اتخلي ايمن يتزوج منها بس هو كان امصكر ع موضوع الزواج نهايي…
في ليبيا
جت ساعة 12 في اليل وخش الدكتور يشوف في حالته لقي حالتي احسن من قبل وانا الخطوره راحت وحالته مستقرة طلع طمن خوالي وقاللهم بكره نبيكم هنا وفي موضوع نبي نقولكم عليه
خالي محمد انشاء الله خير شن في موده فيها شي
الدكتور لاانشاء الله كويسه بس صايره مشكله وشد محمد ع جنبه
الدكتور للاسف البنت صارلها وانها ف المستقبل مش رح تقدر……….
خالي محمد كييف شنيي……
قد يهمك:
- روايات حب ورومانسية كاملة
- روايات حب قصيرة
- روايات حب عربية
- روايات حب سعودية
- روايات حب جريئة
- روايات زوجية جريئة كاملة
روايات ليبية خيالية
الدكتور للاسف البنت صارلها قطع ف النخاع الشوكي وانها ف المستقبل مش رح تقدر تمشي علي رجليها للاسف صارلها شلل نصفي من الحادث…….
خالي محمد : كييف شنيي متأكد يادكتور من الكلام هدا
الدكتور : للأسف كان عندي شك بس لما طلعو الصور تاكدت هيا حصلت الضربه علي راسها وظهرها وقفنا النزيف بس للاسف النخاع كان متضرر هلبا وللأسف مش رح تقدر توقف علي رجليها يعني نصها الوطي صارله شلل
خالي محمد : لاحول ولا قوة الا بالله كان مثاتر هلباا بالرغم من انه كان مش ديما يجيبنا بحكم كان عمله واخد اغلب الوقت بس تاثر هلبا عليا
الدكتور : نبي منك انك تقولهم يلي صار هيا حالته كويسه وانشاء الله اسبوع وتقدر اطلوعها من المصحه شد روحك وأن شأء الله خير وطلع وسيب خالي بروحه
خالي كان متاثر هلباا ومش عارف كيف يقولها لامي تلخبطت لامور ماتوقعش توصل لامور لهنا
طلع من المصحه ولقي خوه الصغير يلي هوا خالي جابر شده وحكاه القصه وقاله نبيك تخبر اختك
خالي جابر انصدم من يلي صارلي وروح لحوشنا وخش للحوش تلاقا هوا وامي قدام الباب امي كانت شاده التلفون وحست بانى في شي صاير شدت خالي وسالته ع الباب
امي : طمني ياجابر شن قال الدكتور علي موده
جابر : الحمد لله حالها احسن توا بس…
امي : قولي شن في شن صاير
جابر : الله غالب الدكتور قال مش رح تقدر تصبي علي رجليها بعد اليوم هدا صاررلها شلل نصفي
امي : انصدمت من كلام جابر واغمي عليها طاحت وجو نساوين خوالي وزحم الحوش وعرفو كل يلي ف الحوش بيلي صارلي
امي قعدت تعيط بصوت عالي قاتلهم توا نبي نمشي للمصحه ونشوف بنتي
خوالي قعدو يهدو فيها بس امي تبيش تهدا لين قالوها توا نرفعوك
رفعو امي وجت معاها مرت خالي للمصحه الساعه12ف اليل وكنت كيف طلعوني للقسم قعدت امي جنبي وكان الجو متوتره هلبا
بعد يومين نضت ولقيت امي جنبي حسيت روحي مش مدكره شي بكل كان راسي تقيل ويوجع فيااا هلبااا اخر شي تدكرته لما شفت البنات علي الجهه التانيه من الطريق
بحتت لقيت امي فرحانه وفي نفس الوقت دمعتها ف عينها
وقعدت نتوجع ومحوتك نتكلم
انا… ماااما خيرني شن صارلي
امي… لا ياحبيبتي ماصارلك شي سياره ضربتاتك بس حالتك كويسه واهو نضتي وان شاءالله الله رح نروحو لحووشنا قريب
انا… اااا باهي شن حال خوتي ووينهم ماجوش توحشتهم
امي… قاعدين ف الحوش معا خالتك مايقدروش يجو إن شاء الله توا نروحو وتشوفيهم حبيبتي
انا… باهي امتي نقدرو نروحو قلقت من هنااا نبي نطلع ونمشي للمدرسه استاحشت صاحبتي
امي : في لحظه نزلو دموعها.. ان شاءالله الله تصحي وتمشي للمدرسه
اانا.. حسيت في شي صاير… امي خيرك تبكي في شيء
امي سكتتت وخش علينا الدكتور
الدكتور.. ماشاء الله عليك حالك كويس يابنتي اليوم
انا : اي احسن بس امتى نقدر انروح نبي نرجع للمدرسه عندي امتحانات
الدكتور : أن شاءالله يومين وتقدري تروحي
انا.. باهي أن شاءالله…
طلع الدكتور وكلمت امي
انا… نبي انوض نمشي للحمام…
وجيت بنوض بس حسيت روحي فاشله ورجليا مايتحركوش
امي.. جت تجري… لا ماتنوضيش الدكتور قال مش لازم تتحركي توا لين اتصحي
انا… بس نبي انخش للحمام
امي.. قربت مني… عادي ياماما قاعدة امركبينلك الكيس موقت توا بعد تطلعي انحوه لك
انا قعدت نبحت ف امي وحسيت ف شي بس ماقدرتش نتكلم مشي الوقت ونا نحاول نحرك رجلي ونلمس فيهم بس بدون فايده مانحسش بيهم
جو خوالي وجو خوتي الصغار وكل مره يجي حد ايسلم عليااا وكانو فرحانين باني نضت من الغيبوبه بس انا كنت مش مطمنه بكل وخايفه نكون صايرلي شي في رجليا
مشي الوقت ونا مش حاسه بحد جنبي بكللل وفكره تاخدني وفكره تجيبني روحو كلهم وقعدت معاي امي وهيااا كانت تغيري في جوي وتهدرز معااي وهكي
بعد يومين عطاني الدكتور خروج من المصحه وكنت فرحانه عشان بنروح للحوش وكل شويه نشد ف يد امي
انا… هيا خلينا نطلعوا
امي… تشبحلي وعيونها امدمعة… شوي خالك بيجي ونورحوا معا بعض
انا… باهي ياامي نستنوه براا نبي نطلع من الدار هادي خلاص مليت
امي… باهي اهو قريب ايجي خير مايجي ايدورنا
كانت خايفة من لحظة اللي نعرف بيها عن حالتي وشوية وصل خالي وفتح باب الغرفه
واني انصدمت لما شفت خالي خاش وجايب معاه كروسه
حسيت بقلبي توقف لحظات وامي تكلم فياااا ونا مش مصدقه
امي…ان شاءالله رح ترجعي تصبي علي رجليلك واحني كلنا معاك ومش رح نسيبوك
الدكتور قال موقت الوضع يبي شوية صبر
… كانت اتصبر فيا وهي عارفة مش ح نوقف ولا نتحرك من جديد
واني كنت نسمعلها و نبكي من غير صوت حسيت بان ربي عاقبني في الدنيا عشان كتت شايفه روحي
جي خالي ورفعني حطي ع الكروسه جربت بنحرك رجليا بس بدون اي فايده طلعنا من المصحه ووروحو بيا للحوش حطوني ف دار ع السرير وقعدت مش مصدقة اني معاش بنرجع بنمشي علي رجليااا
قعدت ندكر ف كل لحظات حياتي يمروو قدامي ودموع ماوقفوش بكل
تسريع_الاحداث
مشو الايام وقعدت بروحي ف الحوش جتني حاله نفسيه بكل معاش قعدت نتكلم معاش قعدت ناكل وزني نقص هلبااا وجهي تغير قعدت طول الوقت راقده ع السرير
قبل كنت ديما نطلع وندهور تغير علياا الوضع هلبااا
قعدو ديما يجوني الناس بس كلمت امي وقوتلها مانبيش نشوف ولا حد ونخلي ف الدار ديما مظلمه ونقعد فيهاا بالايام مانطلعش برا من الدار
يجوني صاحبتي يبوا يقروا معاي بس كنت رافضه مانبيش نشوف ولا وحده منهم
مانبيش نشبح نضرة الشفقة عليا
و كانت عندي صاحبتي اسمها رهف بنت ماشاء الله عليها صاحبتي من صف اول نحبها هلبااا بكل كانت كل يوم تجي لحوشنا طبعا تسكن قريب علينااا
المهم يومي اتجي وعلي اساس تبي تشوفني بس انا كنت نرفض
المسكينة تقعد تستنى وبعدين تياس وتروح
لين ف يوم جت وخشت عليااا بدون مانقولها خشي ولعت الضي وحسيت بالضي قوي في عيوني
بحتت فيها بعصيبه وعيطت عليها
انا… طفي اااالضي وااااطلعي مانبيش نشوف حد ااااني
رهف… شبحت فيا بنظر
بحتت فيها بعصيبه وعيطت عليها
انا… طفي اااالضي وااااطلعي مانبيش نشوف حد ااااني
رهف… شبحت فيا بنظره غريبه… تبي يطفى نوضي طفيه ابروحك هيااا نوضي
انا جيت بنحرك بس ماقدرتش اندفعت بحمقة بيش ننزل بالقوة بس طحت من علي السرير وقعدت نبكي منهارة ونعيط بعلو صوتي
جتني رهف تبكي وحضنتي
وخشت ماما سعدتني نرجع ع سرير
وقعدت رهف تهدرز معاي غيرتلي جوي وطلبت منها انها ديما تجيني وفعلا قعدت تجيني وكل يوم تغيرلي ف نفسيتي
في امريكا
أيمن : مكسد في الشقه متاعا معا صاحبته كارمن وجوه ملبح بكل
كارمن : حبي شن تبي تخدم توا كملت وتخرجت شن رايك في شركه طالبه مهندسين مدارين اعلان ع النت ويبو
ايمن : هعع مزال توا خليني ناخد سنه راحه ونغير بيها جوي اصلا مليت من جو الدراسه نبي نغير جو وقرب علي كارمن
كارمن اي صح شن رايك نطلعو نسهرو اليوم معا قروبنا
ايمن عادي نسهرو اليوم وغضوا ويلي بعده اصلا نا فاضي ومعاك ويبوس فيها ف فمها
كارمن بالشوي حبي خليني توا مش وقتا
ايمن اسسس بس
وقاطعه تلفون رن ايمن وووك التلفون هذا ديما يفسد علينا في لحظاتي طلع تلفونه ولقي امه
ايمن خير يام شن في
نادية كنت بنقولك اليوم راهو بنمشي نخظبلك سالي وقرار نهائي
ايمن بس يامي شن قوتلك اني مانبيش نتزوج انا نبي كارمن سمعت كارمن وجت لايمن
ناديه خلاص قرار نهائي وسكرت الخط
ايمن وووك منها امي
كارمن سمعت الكلام خدت شنطتها وطلعت وهيا تبكي ايمن حاول يوفقها بس طلعت من الشقه
أيمن اتكي علي السرير وولع سبسي وهوا يفكر ومتلخبطه اموره وفتح النت وقعد يقلب
ملاحظة طبعا الكلام كان بالانكليزي بس ترجمتا للعربي عشان كان ديما يحكو انكليزي
عند_موده
رهف حبي عادي انزلك منشور ف قروب وخلي الناس يدعولك يقولو دعوه40مستجابه
انا بس اااا شن بنقولك توا
رهف ولا كلمه خليني انزل وراسك
انا باهي نزلي
نزلت رهف المنشور وكل مره حد يعلق كان تفاعل كبير هلبااا
ايمن كان يقلب قي في للفيس وفي لحظه جي منشور موده قدامه
روايات ليبية رومانسية جريئة
نزلت رهف المنشور وكل مره حد يعلق كان تفاعل كبير هلبااا
ايمن… كان يقلب في للفيس وفي لحظه جي منشور موده قدامه….
ايمن : كان باله مشغول من قصه أمه وشاف المنشور ومادارش اي رد فعل اتجاهه يعني قاعد ماعرفش بانها بنت عمه
بعد ساعه سكر ايمن النت وناض غير دبشه وحاول يتصل بي كارمن بس مادرتش عليه كانت زعلانه هلبااا معاش عرف شن يدير بكل،
ناض ولع سياره ومشي لحوش امه يبي يلحقا قبل لاتمشي لأهل سالي اتصل بامه مادرتش عليه
ايمن ووك منها امي لما تسكر راسها ع حاجه ضروري لديرها قعد يجري ويحاول انه يوصل قبل ماتطلع من الحوش
وصل للحوش فتح السياره ونزل يجري فتح باب الحوش……
عند_موده
رهف : شوفي ياموده هلباا تعليقات وكلهم الناس يدعولك انا ربي يشفيك
انا :كان خاطري ضايق هلبااا ونفسيتي تعبانه واجد قاعده راقده ع السرير وعقلي مش معاي بكل
رهف : موده انا نكلم فيك من بكري راهووو
انا : معليشي بس نحس في روحي تعبانه شن قوتلي
رهف قوتلك شوفي المنشور في هلبا تعليقات وكلهم الناس يدعولك ربي يشفيك
انا انشاء الله ياربي، وقعدت نهدرز معا رهف علي المدرسة قعدت تحكيلي هلباا حاجات حسيت بانا نفسيتي تعبت هلباااا
في أمريكا
وصل ايمن قدام حوش اهله وفتح الباب لقي امه واخته موتيات روحهن ويبي يطلعن
ايمن : كويس بكل يلي لاحقت عليكم يام مش وقتها توا الخطبه والله ماعندي نيه فيها الخطوبه
ناديه : مش طالبه منك انك تتزوج توا مهم انا بنمشي نخطبهلك وبعدين نحدوو العرس بالراحه علينااا هيا خطوبه بس
ايمن : افهمني ياامي عطيني شويه وقت رح يجي يوم ونا نرفعك بروحي وتخطبيلي سالي تمام مهم توا عطيني وقت
ناديه : باهي رح نصبر عليكك بس مش هلباااا راهوو
ايمن : تمام بكل.. وعلي طوول ركب أيمن ف سيارته وبعت رساله لكارمن انها ترد عليهه
ردت عليه وراضيها وقالها اني كلمت امها وانها ميش رح يخطبها سالي نهائي وحدو موعد للسهره اليوم
ايمن كان ذكي هلبااا ديما يعرف يلعبها صح ومن الصعب اي حد يقدر يمشي عليه اي شي من جهة خلاه امه انها تقعد راضيه عليه وانا يسمع في كلامه وخلاها متعلقه انها رح تخطبه سالي ومن جهه انا رضي كارمن وما سيبهاش لانها كانت صاروخ
في اليل طلع ايمن والقروب وسهروو كانت سهره غير وأيمن نسي يلي صار معاه اليوم كلا ورجع للشقه هوا وكارمن وتراضو معا بعض وجوهم حلوو
تسريع_الاحداث
مشت علي الحادث متاعي سنه وكان كل شهر يجي خالي ونمشو لدكتور يطلب علياا ف صور اشعه ندير فيهم بس للاسف يقول حالياا صعب وممكن حتي لو درناا حراجه ماتنفعش ننصحكم هنا معاش اتعبو روحكم لو تبو اطلعو بيها برا وعالجوهاا،
احني كلنا ناخدو في مصروفنا من خوالي وماكانش عندنا اي فلوس عشان نتعالج بيهم برا حسيت روحي اني خلاص فقدت الامل اني نرجع ونمشي ع رجليلا
زادت نفسيتي تعبت وبالاكثر لما سيبت المدرسة ورهف لما جوها الامتحان قعدت معاش تجيني وحسيت بالوحده ونفسيتي تعبت أكثر من قبل
ايمن في السنة هادي كل مرة ايجيب في عذر لامه عشان خطوبته لسالي وبعد شهور ناديه ام ايمن ياست منه وقررت اتحطه تحت الامر الواقع
في يوم قررت ناديه انها خلاص معاش اضيغ وقت وانها تخطبه خدت تلفونها ورنت علي سالي
ناديه : الوو حبيبتي سولة كيف حالك
سالي: بدلع كانت تدلع هلبا.. اهلين اعميمة الحمدلله بخير انتي كيف حالك وكيف حال العيلة كلها
ناديه / الحمدلله تمام ااا سولة قلتلك ان شاءالله غدوة بنجي نشرب قهوة عندكم كان قاعدين
سالي كيف اللي حست بتجي تخطبها لايمن ابتسمت
سالي.. ايه اتفضلي باي وقت اتشرفي واتانسي
ناديه : الله ايسلمك ويعزك حبيبتي
باهي توا مانعطلكش سلمي على امك وغدوة ساعة تسعة نتلاقوا ان شاءالله
سالي.. اوكي سلام
وصكرت الخط وصبت خشت على بنتها
ناديه .. بنعرف اني شن قاعدة اديري بالتلفون طول اليوم
دانيا.. اوووه ياماما شن عندي ماندير اهو انراسل في القروب بتاعي
ناديه .. قعمزت جنبها ع سرير.. ماعلينا المهم اني خذيت موعد غدوة نمشي نخطبوا سالي
دانيا .. وايمن يعرف؟
ناديه . لا مش ح نستنى لين انقوله خلاص بنمشي انكلم امها وابوها وايمن كيف الشاطر بيوافق بعد مانضغط عليه
دانيا .. مش عارفة مرات ايعاند ويعك فها
ناديه.. لالا ايمن مايرضاش فيا يحرجني معهم
..
المهم فات اليوم وحتى اتصال مااتصلتش بايمن وهو هايم في شغله الجديد بعد مافتح مكتب ويقعد فيه نص اليوم وباقي وقته بين سهر و ديسكوات
كانت حياته هياجة و بضغ مش نكدي مايحبش جو التقيد والا ايحب المسؤلية
ثاني يوم جت الساعة ثمانية كانت ناديه جاهزة و خشت على بنتها دانيا تمشي معها وماحوتك وافقت تطلع لان دانيا حتى هي ماتحبش جو الارتباط والعلاقات الاجتماعية
وقتها كله يا تطلع مع صحباتها يا ع تلفون فاتحة قروب كبير ع الفيس اسمه استايلي. مختص بكل شي ايخص الجمال والاناقة وهي ارتست ناجحة في مجالها و وجه اعلاني لشركات عالمية كبيرة
المهم مشو من غير مايعرف ايمن واستقبلوهم اهل سالي
و بعد وقت من الهدرزة تكلمت ناديه وطلبتها و لان سالي اتحب ايمن وتستنى فيها الحظة هدة من زمان ردت على طول وافقت و تموا في الموضوع ليلتها
وناديه دارت اعذار ان ايمن مشغول في شغله ومالحقش ايجي معهم ووووو
بعد روحوا ساعة 12 في اليل
مشت نادية اتصلت على ايمن
ايمن.. ايوة يا امي خير ان شاءالله
ناديه.. اتسوق.. انت وين توا
ايمن.. قاعد في الحوش
ناديه .. تمام اهو جاية عندك
ايمن.. اتانسي بس شن لزومها جيتك بهالليل مش عوايدك
ناديه .. توا بعد نوصل انقولك هيا سلام..
بعد وصلت دقت ع الباب وفتحلها ايمن
ناديه ..مساءالخير
ايمن.. مساء النور اتفضلي خشي يام.. وخش قدامها وهي وراه
ناديه.. قاعد بروحك
ايمن.. كارمن امسافرة لوس انجلوس اتزور هلها
حنان.. احسن باهي ان شاءالله معاش ترجع
..وقعمزت حطت رجل على رجل
ايمن.. شبحلها.. ياامي فوتي الجو اهواه قاعد ايضايق فيا
ناديه .. مش عارفة شن دايرتلك لين متمسك بيها بيدك وسنونك لا اصل لا فصل
ايمن.. عصب.. تواااا جاااية عشان اااتسممي في دمي
ناديه .. اسمع يا ايمن صبرت عليك فوق من الازم بس لهني وبس
ايمن.. شن قصدك
ناديه.. تعرف من وين جاية توا
ايمن.. شنو من وين
حنان.. كنت نخطبلك في سالي والحمدلله وافقوا و اتفقنا انديروا حفلة لخطوبتكم يوم الاحد الجاي
… وايمن قعد مصدوم يشبحلها بغضب
ايمن.. كيف اديري حاجة من غير مانعرف
ناديه .. بعصبية.. مااهو اانت لو تعرف كنت درت الف عذر وتتهرب مني
ايمن.. بعياط.. هي حياااتي ولا حيااتكم شن تبواا اااتخشوا في خصوصيااتي
من يوم ما انخلقت كل حد وحررر في حياته وتصرفاته علاااش جاية توااا تفرضي رايك علياااا
… وقعدوا في نقاش طويل و مشاحنات وووو وفي الاخير
ناديه .. خلاص مجبور اتكمل ماهو مش معقولة اطلعني معنديش كلمة
ايمن.. امقعمز و حاط راسه بين ايديه
وقعدت امه اتوز عليه و خلاته ايوافق بالسيف
بس هو من جواته كان بيسايرها ويتم الخطوبة وبعدين يلقى عذر يفسخها
عند_موده
انا قعدت طول هالسنه هادي في الحوش لاخشه ولا طلعه
وصلت لمرحله معاش نحس باي شعور لا فرح ولا حتى حزن قعدت كيف الانسان الميت نفس يطلع ويخش وخلاص
صار شكلي كيف الزومبي شعري مانخليش حد يمشطهولي كرهته وكرهت حياتي
وفي يوم خشت عليا رهف واني بعد سمعت صوتها درت روحي راقدة
رهف.. مودة نوضي نبي انقولك على حاجة
.. واني ولا رد
رهف.. شدت من عليا الغطاء.. عرفتك واعية وقاعدة تسمعي
انا.. شن تبي يارهف
رهف.. قعمزت جنبها.. تعرفي في قروب اسمه جبر الخواطر اي حد عنده مشكله ولا مريض اينزل منشور واتجي الناس توقف معه اتساعده تجبر بخاطره
انا.. اي باهي عرفت توا خليني نرقد نحس روحي نعسانة
رهف.. ماكملتش مزال
انا.. بالله يارهف ماعنديش اخلوق لقصصك
رهف.. اسمعي بس اني قلت لامك عليه القروب ونزل قصتك بالكي اتحصلي من ايساعد في علاجك
انا.. عيطت عليها… خلااااص معش اااتجيبولي سيرة اني معش بنمشي بنقعد هكي لين ااانموووت
رهف.. علاش الياس هذا نحن انجربوا شن خاسرين
انا… قعدت نبكي.. ماتعبوش روحكم من بيساعدني اني عمليتي برا وتبي هلبا افلوس و ااارجوكي يا رهف فوتيني معش بنمشي خلاص تعودت على عيشتي..
وقعدت نبكي لين صوتي راح
رهف.. اضايقت.. مش ابكيفك انا توا نمشي انزل عليك تبي تزعلي ازعلي… ومشيت طلعت و حكت مع امي
وفعلا دارت منشور طويل اللي يقراه يتاثر منه ونزل في قروب جبر الخواطر وفي ساعة وحدة حصل على 10الاف اعجاب وتعليق وطبعا كل التعليقات دعوات بالشفاء وفي من يتبرع بالف او بالكثير الفين الناس على قد مقدرتها اتساعد
بعد ثلاث ايام
كان ايمن متعارك مع كارمن بعد جت ولقاته خاطب من سالي هي خشت لدارها امعصبة منه وهو قعمز في صالة يتصفح بالنت
و طلعله منشور القروب قراه كله وتاثر هلبا
وكا اي شخص حاب ايساعد كتب يبي رقم الحساب بيش يتبرع وكان ناوي يتبرع بملغ قريب خمس الاف دينار بس بعد ماتواصل مع الادمن و اعطاته اسمي بالكامل وين نسكن شك في اللقب كيف لقب عيلته
و قعد طول الليل يتواصل من شخص لشخص لين تاكد من اسمي وعرف ايمن ان البنت هادي تكون موده بنه عمه……
روايات ليبية جميلة
وقعد طول الليل يتواصل من شخص لشخص لين تاكد من الاسم وعرف ايمن ان البنت هادي تكون موده بنت عمه……
ايمن : انصدم يعني ف لحظه دماغي وقف اتكي ع الصالون وكان مش مصدق يلي صاار بكل
المهم كلم الشخص هذا وقاله نبيك تعطيني العنوان وين يسكنوو وفعلا الشخص عطاه عنوان السكن وهكي قطع الشك بالقين وتاكد 100 ٪انها موده بنت عمه
ايمن :سكر التلفون وحط يديه ع راسه حس بروحه انااا قصر معا اهل عمه وطبعا ايمن يعلم اناا عمه توفي من كم سنه وهذا يلي زادت الموضوع عليهه
ايمن : اتصل بامه وقاللها وينك نبيك ف موضوع توا
ناديه : انشاء الله خير شن في
ايمن.. كل الخير اهو مسافه الطريق ونوصل فيك انا وكارمن
ناديه : حوشي مفتوح ليك بس ماتجيبهاش معاك كارمن لأنها والله مارح تهوالي حوش
ايمن :كان يفكر في موده هلباا.. باهي توا نجي بروحي وسكر الخط
لبس أيمن الجاكيت متاعه وطلع ع طول تلاقا هوا وكارمن في الممر
كارمن : بيب وين بتمشي تواا
ايمن.. عندي موضوع بنكمله ع السريع وانشاء الله مانطولش عليك خليك ف الشقه وماتتطلعيش منها وطلع
وصل ايمن قدام حوشه اهله ونزل فتحته أمه وخش للحوش
عند_موده
جي خالي جابر وقعمز برا هوا وامي ويحكو بيناتهم
امي : طمني ياجابر شن صار في المبلغ قدرنا نوفرو منه
جابر : في هلبااا نااس تبرعوو بس المبلغ كبير وصعب انا نحصلو في الوقت هذا يبي صبرر وانشاء الله يصير خير
المهم شن حال بنتك الايام هادي انشاء الله احسن من قبل
امي : والله بنتي تعبت نفسيتها ووجها وله شابح وعيونها من الدموع لين خلاص لو علياا نبيع عمري ونعطيها مهم نرجع نشوفها تمشي قدامي
خالي جابر.. إنشاء الله والله بس موضوع يبي صبر وين قاعده نبي نشوفها ونحكي معاها
امي : اي اهيا قاعده ف الدار خش شوفها وطمنها
خالي جابر.. هي
خش علياا خالي ودرت روحي راقده كنت مانبيش نشوف لي حد خلاص تعبت من الناس
خالي موده بنتي نايضه؟
انا نسمع فيه وساكته مارديتش عليه بكل
امي.. نوضي خالك جايبك اخبار حلوه ع علاجك
انا.. فرحت ونضت.. شن صار حصلتوو الملبغ يعني،
خالي اي حصلنا حالياا مبلغ كويس وفي هلباا ناس تبرعو وإنشاء الله مايجيش شهرين الا وكنو حصلناا الملبغ
ايساعد اديري العملية في تونس وخلاص
انا.. بس مش ناجحة في تونس الدكتور قال في بلاد برا عمليتي حساسة مش اي حد ايديرها
خالي.. الله غالب هذا اللي نقدروا عليه انتي شن خاسرة بالكي تحصلي نتيجة كويسة
انا.. نزلت راسي كنت حاسة بالاحباط.. مش عارفة شوفوا اللي تريحكم
امي.. كنك مودة مش فرحانة ولا شنو
انا.. لا عادي فرحانة
خالي.. خلاص شهر و نمشوا لتونس..
وشبح لامي.. اعطيني صور ليها خليني انديرلها جواز سفر
امي.. باه ان شاءالله.. وصبت جابتله صور شخصية وخذهم وطلع
انا.. امي خايفة مايصيرش منها في تونس
امي.. جت قعمزت جنبي.. ليش التشاؤم يا بنتي حتى تونس عندهم امكانيات ودكاترة كويسين
انا.. عارفة بس لو العملية ناجحة في تونس كان قالها الدكتور هو عارف ان وضعي مش كيف
امي.. حست بقلت حيلة .. شن بنديروا لو بيدي كنت طرت بيك من اول يوم بس انتي شايفة الوضع
انا.. سندت للخلف.. نبي نرقد طفي معك الضي..
و امي حست بيا اني ضايقت ماحبتش اتزيد عليا صبت وطفت الضي
وانا قعدت نبكي
في امركيا
وصل ايمن لقدام حوش اهله وخش للحوش قعمز ع الصالون
ناديه : شن في ياولدي اعصابي علي نااار خوفتيني
ايمن : قعمزي مافي شي بس بنقولك كم ليك معاش كلمتي مرت عمي امنه
ناديه : ليا فتره هلبااا يعني 6 سنوات بس انتا شن دكرك بيها الوقت هذا وليش جاي توا شن في
ايمن : شوفتي يام قديش احني مقصرين معا عيلته عمي عمي مصطفي يلي زمان لما بوي كاين قاعد في امريكا هوا يلي يتصل بيه من غادي عشان يطمن عليه وعلي صحته في وقت كان بوي هوا يلي مفروض يتصللل بيه
عمي يلي لما بوي مانكرش حقه معاا وباع الارض وبعث افلوس ليناا بالرغم احني عندنا فلوس ومش مستحقين لحد وهوا كان مستحق للدينار بس مباش ياكل حقنااا
ناديه : نعرف وكلامك صح بس الوقت يمشي ومن وفاته معاش صار تواصل بيتاتنا خير شن صاير توااا
ايمن : بنت عمي موده لقيت منزلين عليها منشور وأنها تعرضت لحادث سياره ومعاش قدرت توقف على رجليهااا بكل
ناديه : حيي امتي صار لكلام والله ماسمعت
ايمن : عندك الحق ماتعلميش بيهاا من امتي اتصلتي بيهم انتي بكل
ناديه : خلاص يااايمن معاش تزيد عليااا
ايمن : توا إنشاء الله رح نوقف معاهم مهم عندك رقم مرت عمي
ناديه اي بس خبرني شن بدير قبل
ايمن : عطيهلي وتوا نقولك
نادية تمام وعطت الرقم لايمن
ايمن خدي الرقم وطلع ركب في سيارته وروح للشقه متاعه وهوا يفكر وصل لقي كارمن راقده كانت الساعة 2في اليل عندهم
المهم فتح النت وقعد يدور علي افضل مستشفيات في أمريكا
طلعو كم اسم مستشفي كتب اساميهم ف ورقه
وسكر النت واتكي بس ماجاشي نوم عشان كان يفكر شن بيحكي غضوا
المهم جي الصبح الساعه12الظهر أيمن خدي الرقم ومشي لأقرب مكان متاع اتصالات ورن علي ام موده
آمنة : قاعدة ف الحوش تفطر في موده رن تلفونها لقاته رقم دولي استغربت منو الرقم هدا مابتش ترد
المهم بعد 5 مكالمات ردت عليه
ايمن طبعا كان يعرف يتكلم عربي
ايمن.. السلام عليكم خالتي امنه كيف حالك
امي.. وعليكم السلام من معاي
ايمن.. انا ايمن ولد سالم عرفتيني
امنه.. اي عرفتك ياولدي كيف حالك وحال امك وخوتك
ايمن.. الحمدلله بخير شن حالك وشن حال الصغار ومودة
امنه.. الحمد لله بخير من ربي بس بنتي مودة مريضة صايرلها حادث
ايمن.. اي امس بس سمعت ان شاءالله لاباس عليها يا عمتي امنه بنجيك من لاخير تمام انا سمعت بانكم دايرين جمعيه عشان علاج موده ونبي نقولك ان العلاج انا رح نتكلف بيه كامل
وشفت مصحه هنا ف امريكا وعلاجهم كويس انتو بس تعالو لامريكا والباقي علياا انشاء الله
امنه : بس ياولدي والله مانعرفش شن بنقولك يعني تواا..
امنه : بس ياولدي والله مانعرفش شن بنقولك يعني تواا..
ايمن ماتقولي شي بكل كلمي لي حد من خوالها يجي معاها وتعالو انا ف انتظاركم
وباذن الله ترجع كيف قبل واحسن
امي.. باهي إن شاءالله الله يصير خير
ايمن.. تمام توا نرن عليك بعد يومين ونشوف شن يصير معاك
امنه : إن شاءالله الله.. وسكرت الخط
انا.. من هدا ياامي اللي اتكلمي معه
امي.. هدا ولد عمك يلي قاعد في أمريكا
انا.. ايمن؟
امي.. اي ايمن وطلب منا انا نجو غادي عشان هوا يلي بيتكلف بعلاجك كلا
انا فرحت هلبااا بكل بس حسيتها تقيله يعني انا مانحبش يكون لحد علياا جميل بس ماكانش عندي حل وافقت
امي : توا نكلم خوالك بالك يمشوو معاك وان شاءالله الله يصير خير انا مانقدرش نمشي عشان خواتك من بيقعد معاهم
انا.. باهي كلميهم يجو اليوم
امي اتصلت بخوالي الثلاته وقاتلهم تعالو ف اليل
قعدت طول الوقت ندعي انهم يوافق حد منهم يمشي معاي عيوني دموعي حسيت انا ربي عطاني اخر فرصه ليااا قعدت ندعي وندعي
جي اليل وجو خوالي وامي حكلتهم القصه قاتلهم ايمن قالها انه بيتكلف بعلاجها بس يبي حد يجي معاها لغادي
خوالي كل واحد قعد يشبح ف التاني وكل واحد يقول للتاني امشي عشان مش فاضين
خالي محمد.. يا امنه راهو عمليتها وعلاجها يبي سنة تقريبا كيف بنسيبوا اشغالنا ونمشوا لامريكا وكل حد فينا واره مسؤلايات وعيلة صعب بكل
امي.. قعدت تبكي.. باهي نمشي معها اني
خالي جابر.. كيف تمشي والصغار من بيقعد معهم يبوا من يهتم بيهم ويدير باله منهم
امي.. وشن الحل نحن ماصدقنا لقينا من ايسعدها
خالي محمد.. وتونس من شن تشكي ع الاقل قريب وكل اسبوعين ايجي حد يقعد معها مش في امريكا تمشي ومتعرفش امتى اتروح
خالي جابر.. محمد عنده الحق خلينا انديرولها عملية في تونس وان شاءالله مايصير الا الخير
.. وقعدوا يتفاهموا بيناتهم انهم يرفعوني لتونس واني بعد سمعتهم زعلت وقعدت نبكي حسيت روحي قاعدة وحيدة وغريبة مافيش حد يبي مصلحتي
وحزنت ان فرصة وضاعت عليا
الصبح خالي دز اوراق وصور لمستشفى في تونس بيش ايشوف ايدروها عندهم
والمستشفى رد عليه وقالوله العملية هذه مايدروش فيها لان نسبة نجحها ضعيفة
جانا خالي وقالها لامي قعدت تبكي واني بعد عرفت معش نبي حد ايكلمني و قعدت في حالة
ثاني يوم اتصل ايمن
ايمن.. الو عمتى امنه كيف حالكم
امي.. الحمدلله
ايمن.. ها شن صار امتى تقدروا اتجوا
امي.. قعدت تبكي.. ماصارش مافيش يقدر ايسافر بيها وحتى قبل بنمشوا لتونس قالوا مش ناجحة عندهم… وزادت تبكي
ايمن.. وانتي يا عمتي ليش ماتجيبها والله ماتفهموا حاجة كل شي اني اللي ندفعه
امي.. عارفة ماتقصر بس اني وين انسافر وخوتها من بيقعد معهم
ايمن.. عصب.. بس هذا مش عذر راهو ياعمتي
امي.. الله غالب اني مابيدي شي
ايمن.. قعد ينفخ.. باهي ايصير خير توا نتصرف…
وصكر منها
كارمن..ليش معصب شن صار
ايمن.. مافيش حد ايسافر معها ايجيبها
كارمن.. مسكينة مزالت صغيرة لم تعيش حياتها بعد
.. وايمن مستند ع صالون ويفكر شن ايدير من حل
فات اسبوع
مافيش جديد قاعدة على حالتي وحتى الوكال معش ناكل بكل وايجبوا في جارتنا ممرضة اتركبلي في تغذية
في يوم
ايمن.. كارمن اني بنسافر غدوة لليبيا
كارمن.. بزعل.. لماذا
ايمن.. قررت اني اللي نمشي وانجيبها لهني
و دير عمليتها
كارمن.. كم الوقت الذي سوف تغيب فيه
ايمن.. ان شاءالله مش ح نعطل اسبوع او عشر ايام بالكثير
كارمن..اوكي و انا ايضا بنسافر اقدم في جامعة واشنطن بنكمل دراسات
ايمن.. تمام ح نقعدوا على تواصل…
و قاللها بيمشي لامه ايخبرها بقراره
وبعد عرفت ناديه ماكنتش موافقة ان هو اللي ايسافر وبعد مالقاته مصر قالتله دير اللي ايريحك
ثاني يوم كان في المطار واتصل على صاحبه قاعد في ليبيا
وساعة 5 العصر باب حوشنا ايدق
امي.. من
ايمن.. افتحي يا عمتي انا ايمن….
انا استغربت من ايمن هذا ماتوقعتش انا ايمن كنت نسمع فيهم ونا ف الدار
امي اهلين ياولدي تفضل ليش تعبت روحك وجيت
ايمن لا والله ياعمتي فيش تعب ولا شي شن حالكم وشن حال موده إنشاء الله احسن توا
امي والله ياوليدي زي ماتشوفي قاعدة ع السرير وماتتحركش بكل
ايمن إنشاء الله ربي يشفيها نقدر نشوفهاا
امي اي عادي بس خليني قبل نخبرهاا
ايمن تمام خودي راحتك هي وقعد ف الصالون يشبح ف حوش عمه كيف كاين ناقصاته كم حاجه كان حوش علي قد حالنا
خشت امي وخبرتني انا ايمن يبي يشوفيني ماكتتش نعرف شكله قبل بكل ولاعمري شفتاا
مهم قولت لامي عطيني الوشاح عطتني امي الوشاح حطيتا ع راسي واتكيت ع السرير
خش ايمن انا نزلت راسي لوطا وماشفتش حتي وجه كنت متحشمه هلبا،
ايمن شن حالك موده
انا : بصوت واطي بخير الحمد لله
ايمن علي صوتك شوي خيرك
انا عادي قوتلك الحمد لله المهم انشاء الله احني معاك ومش رح نخلوك هكي وأنشأء الله نلقولك حل
امي بس كيف ياولدي صعب مافيش حد يبي يمشي وخوالها معارضين
ايمن بس اني عندي حل رح يوافقو ع طول لما يسمعوه
امي وانا شن هوا الحل…..
ايمن بحتت فيااا الحل ياعمتي انا……….
الجزئ الاخير
ايمن : بس اني عندي حل رح ابوافقو ع طول لما يسمعوه
امي : وانا.. شن هوا الحل…..
ايمن : شاف لامي.. الحل ياعمتي موده تسافر معاي لامريكاا وغادي تقعد معا امي ادير بالها عليها ونعالجوهااا
امي.. انا ماعنديش مانع بس مش عارفة لو خوي محمد وجابر ايوافقوا
ايمن.. وعلاش يرفضوا اني بنريحهم من المسؤلية وبتمشي اتعالج
امي.. خوتي صعبين و لو رفضوا بنسكت غصب عني حاول انت تقنعهم الله ايربحك
ايمن : عادي مافيش اي مشكلة توا نقنعهم المهم ان شاءالله يقبلوا
امي.. إن شاءالله اكيد تعبان من السفر خليني نديرلك شي تاكله وتتريح
ايمن : لا ماتعبيش روحك ماعنديش نيه والله
امي.. عيب عليك انتا زي وليدي ومافيهاش اصلا تعب نوض توا نعطيك دار ارتاح فيها وشويه نوتيلك الغدي
ايمن بارك الله وناض طلع
انا : كنت لابسه الوشاح ونبحت فيه بالدرقه من تحت عطاني بظهره ماريت شي من وجهه بس كان لابس جاكيت اكحل وقميص ابيض
ايمن.. عمتي لو تخبريهم انا جيت ولو مافيش مانع اليوم يجو هنا عشان نتفاهموو
امي.. اي انشاء الله رح نتصل بيهم
ايمن : تمام التمام اتكي ايمن في الدار كانت عبارة عن دار بسيطه فراش ومخده عاديات يعني مش زي ماتعود يقعمز علي صالون وهكي
قعمز ايمن وفتح تلفونه فتح شبكه Wi fi يحاسب روحه قاعد في اميركا يخش ع النت ع طول
المهم مباش يفتح النت قعد يجرب بس بدون اي فايده خشت امي عليه ودارته غدي خفيف ع السريع يعني وعطتتها
ايمن : معليشي ياعمتي مافيش شبكه متاع نت هناا
امي.. لا والله انا بروحي مانعرفاش ومافيش حد يستخدم فيه
ايمن.. اها تمام باهي بنسالك مافيش كافي قريب هنا
امي: في في نهايه الشارع ع اليسار
ايمن.. تمام أنا بنتغدا وبنمشي للكافي عشان نفتح نت ونكلم امي وهلي غادي
امي.. تمام خود راحتك
تغدا ايمن وهوا بيطلع جت امي وعطاته 10جني عشان ماكانش عنده فلوس ليبيات مباش ياخذهن وقاللها عندي فلوس وتوا نمشي نصرفهم بس امي حلفت ياخدهم
وصل ايمن للكافي وفتح نت اتصل بكارمن هدرز معاه بعدها كلم امه وهدرزو وقاتلا ماطولش عشان سالي زعلانة ماقللهاش ولازم يتصل بيها ايراضيها
قعد ايمن ف الكافي وقال مانبيش نروح عشان مانزعجش خلي يجي اليل ونروح
ناديت علي امي وجت قعمزت جنبي وقوتلها
انا.. شن صار وشن قالك ايمن
امي : ايمن قال في مستشفى كويس وعمليتك ان شاءالله سهله وبادن الله رح ترجعي تمشي
انا.. لما سمعت كلام امي فرحت هلباا
انا.. قصدك انا بنرجع نمشي من جديد علي رجلياا وبنمشي للمدرسه
امي.. اي انشاءالله بس المشكله في خوالك توا مافيش حد منهم فاضي وانا مانقدرش نمشي معاك وان شاءالله ايخلوك تمشي معه بروحك
انا.. عيوني دموع.. بالله عليك ياامي ديري حل نبي نرجع نمشي علي رجليا كلميهم وشدي فيهم ياامي والله خلاص عييت من الفراش نبي نرجع كيف قبل
امي.. رح ندير كل جهدي خليني توا نتصل بيهم..
واتصلت امي بخوالي وخبرتهم انا ايمن جي ويبي يشوفهم
جت الساعه8في اليل وامي دارت عشي وروح ايمن خش غير دبشه وتعشي وقعد يستني في خوالي بعد ساعه جوو وسلمو علي أيمن وخشوو المربوعه وقعدو يحكو
قولت لامي خلي باب الدار مفتوح عشان نعرف انهم رح يتعاركو ويعلوي صوتهم كنت حاطه يدي ع قلبي وندعي انا تمشي لامور علي خير وواحد من خوالي يمشي معاي
خالي محمد.. قالت امنة تبي تهدرز على موضوع مودة وسفرتها ادير عملية
ايمن.. اها صح اني جيت خصيصا عشان مودة وعمليتها
خالي جابر.. بارك الله فيك بس شن تبي ادير يعني
ايمن.. انا قلت بعد انتم مش فاضيين وحتى مرت عمي ماتقدرش تمشي معها
لهذا اني هنا وجيت بيش نرفعها معاي وان شاءالله ادير عملية و علاج طبيعى لسنة لقدام وترجع ليبيا تمشي من جديد
خالي محمد.. كيف ترفعها انتا مافهمتش ممكن توضحلي؟
ايمن.. مافيهاش كيف مودة تمشي معاي لامريكا وامي واختي جنبها كان احتاجت حاجة
… خوالي كل حد شبح للثاني
خالي محمد.. معليشي بس ماينفعش تمشي معك بروحها
ايمن.. نعم وليش لا شن اللي يمنع
خالي محمد.. انت ناسي انت مش محرم ولا حياتكم في بلاد الاجانب نستكم الحرام والحلال
ايمن.. ضحك… وشن دخل الحرام والحلال في الموضوع هذه بنت عمي وكيف اختي
وبعدين هي طفلة ونا نشوف فيها زي اختي مش اكثر
خالي محمد.. لا يا استاذ مش اختك والبنت بلغت
مايصحش تمشي معك راهو تبوا تنزلوا في كم دولة وكم يوم بيش توصل لامريكا وعند هلك تقدر تقولي من
ايساعدها في احتياجاتها ولا حتى هذه تبي اديرها انت
ايمن.. بغضب… ليش التعقيد انا نعرف كيف نتصرف المهم مودة تسافر وتحصل علاج
خالي جابر.. اسمع طلعها من راسك فكرة تمشوا بروحكم شن بيقولوا الناس طلقوها مع راجل بروحها والله اعلم شن ايصير معها
ايمن.. رقيتله.. شنووو الافكار اللي عندكم القصة ماتبيش كل هالتعقيدات لا الناس لها دخل ولا انتم اصلا لكم دخل تمنعوني بنت عمي وانا المسؤل عليها
خالي محمد.. صبى معصب.. والله توا تذكرتها بنت عمك امشي ارجع وين ماكنت راهو مستحيل على جثتي انخليها تمشي معك
ايمن.. حتى هو صبى معصب.. انت شن اتقول انا جيت بسباتها بيش انساعدها مش جاي انتعاندوا هي صاحبة القرار مش انتم وانا توا انخش نسالها… وجاء بيخش مسكه خالي جابر
انا : كنت نسمع في الكلام ودموعي ع خدودي حسيت بانا الوضع خلاص مش رح يصير منه بكل
خالي جابر.. وين تحساب روحك ماعندناش البنت هي اللي تقرر انا وخوي محمد المسؤلين عليها وعلى امها وخوتها ويلا لو سمحت اطلع دور وين اتبات والصبح روح لهلك ماعندناش بنات ايسافروا بروحهم
ايمن.. عصب زيادة.. بس ااانتم حكمتوا عليهااا بالموت
خالي محمد.. نحن احرار انت بس اطلع منها..
وقعدوا يتناقش معهم بعصبية وتعاركوا بالكلام لدرجة خالي جابر جاء بيضرب ايمن
وامي امقعمزة تبكي ماتقدرش توقف في وجه خوتها وتوقف مع ايمن ومع مصلحتي
وانا اصواتهم في اوذاني وسمعت كل كلامهم وقعدت نبكي بصوت وفقدت الامل بعد ماسمعت ايمن قاللهم ذنبي في رقبتهم وهو بري منهم وطلع بيش غدوة ايسافر
صارت في حالة
و حتى بعد خشوا خوالي مابيتش نرد عليهم وقعدوا ايوصوا في امي معش تتواصل معه وتوا بعد ايحصلوا عيادة كويسة في تونس هما يرفعوني
ايمن بعد طلع من حوشنا خدي شطنته ومشي لاول اوتيل وكان راقيله بكل رقد اليوم الأول لانا ماكانش عنده نيه يكلم حد
تاني يوم إتصل رنت عليه امه رد عليهاا
ناديه… ها ايمن شن صارر معاك شفت اهل عمك
ايمن… بعصبيه اي شفت بس ماتوقعتش هكي يكونو
ناديه… خيرهم شن صار
ايمن… معقدين بكل مافيش حد يبي يجي معا البنت هنا ولما قوتلهم اني انا بنرفعها قالو لا حلل ولاحرام
ناديه.. يعني الخلاص انك بتروح يعني..
ايمن….. اي يومين ومروح خيرا شن في
ناديه… سالي تسال عليك هلبااا وتبي تكلمك ذان تقدر تواصل معاها
ايمن…. باهي ياامي توا نروح ونكلمهااا
ناديه.. باهي بنسالك مفتاح الشقه متاعك وين نبيها
ايمن.. ليش شن في
ناديه… نبيها بس وين حاطهم
ايمن…. قاعده عند صاحب العماره توا نبعتلك رقمه خوديهم منااا وأنشأء اليومين يومين ومروح انا
ناديه…. تمام وسكر الخط
دانيا…. شن تبي في مفتاح شقه ايمن يام
ناديه… بنتفق معا اهل سالي اني بندير الخطوبه اليوم يلي بيروح فيه ايمن عشان تكون مفاجأة ليه وبنزينو الشقه متاعه نبيك تساعديني
دانيا…. يامي ماتستعجليش ايمن مرات يدير مشكله راهو
ناديه… ماعليك من ايمن وناضت اتصلت باهل سالي وحدوو كل شي
فات يومين وفقدت الامل خلاص ايمن اكيد سافر توا وقعدت لا ناكل ولا نشرب
وفي اليومين هادم كان ايمن يستني في خوالي ويغيرو رايهم بس مافيش حد منه كلمهخدي شنطنته وطلع للمطار
في المطار كان ايمن حاجز ويسافر قعد يستنى في موعد الرحلة وكل شوي يتذكر حالتي ينقهر ويقعد ايخمم وبعد قريب ساعة نادو
ركاب الرحلة صبى ايمن
عندنا كنت راقدة وامي ادير في فطور لخوتي بيش يمشوا للمدرسة دق الباب
امي.. من
ايمن.. ايمن ياعمتي افتحي
امي.. استغربت وفتحت طول.. ايمن كيف حالك شنو مازلت قاعد
ايمن.. ايه مزلت ممكن انخش نبيك في موضوع مهم
امي.. اي خش الحوش حوشك.. وخشوا
ايمن.. بنتعبك تتصلي على خوتك لان شوية اخرى بيجوا ناس اني جايبهم
امي… اي ان شاءالله بس خير من الناس اللي بيجوا
ايمن.. توا تعرفي بس ياريت اتعجلي
امي طول اتصلت بيهم وقعدوا ايعاركوا ليش دخلاته ووووو
وبعد ربع ساعه كانوا قعدين
خالي محمد… خير شن تبي اخرى
ايمن.. توا انقولكم بس خليني نتصل بصاحبي عطل
اتصل وشوية ودق الباب
ايمن… اهو جوا ممكن تفتحولهم ونخشوا للمربوعة
بعد لحضات كانوا الكل موجودين واستغربوا من اللي جاي مع صاحب ايمن
ايمن… انا طالب بنت عمي على سنة الله ورسوله وانا احق فيها نتزوجها
انا سمعت الكلام ومش مصدق……